Efnisorð
Tegund

Leita eftir efnisorðum

Sýnir 701–750 af 1835
Raða eftir:
21. sep. 2021Heilbrigðisráðuneytið, Líf og heilsa

Stórt framfaraskref stigið með rafrænum sjúkraflutningaskýrslum

Þróun rafrænna sjúkraflutningaskýrslna er að ljúka, prófunarferli að hefjast og stefnt að því að innleiðing þeirra hefjist í byrjun næsta árs. Þessi tækni markar tímamót. Hún eykur öryggi sjúklinga með skjótu aðgengi sjúkraflutningafólks að upplýsingum um skjólstæðinga sem gagnast við ákvarðanatöku á vettvangi og skráning nýrra upplýsinga verður samstundis aðgengileg heilbrigðisstarfsfólki sem tekur við meðferð sjúklingsins í kjölfar sjúkraflutnings. Markmiðið með rafrænum sjúkraflutningaskýrslum er að auka gæði skráninga, bæta aðgengi að upplýsingum og efla gæðavísa og gæðastjórnun í utanspítalaþjónustu.

21. sep. 2021Heilbrigðisráðuneytið, Líf og heilsa

Aðgerðaáætlun um sjúkraflutninga og bráðaþjónustu til ársins 2025

Svandís Svavarsdóttir heilbrigðisráðherra hefur samþykkt aðgerðaáætlun til fimm ára um sjúkraflutninga og bráðaþjónustu sem hefur að markmiði að efla og styrkja þessa þjónustu á landsvísu og auka gæði hennar. Áætlunin miðar að því að skapa betri yfirsýn yfir framkvæmd þjónustunnar, skilgreina þjónustuviðmið, setja viðmið um viðbragðs- og flutningstíma og tryggja að sjúkraflutningafólk eigi ávallt greiðan aðgang að faglegum stuðningi þegar á þarf að halda. Einnig er fjallað um aðgerðir sem miða að því að efla nám sjúkraflutningafólks og bráðatækna, svo fátt eitt sé nefnt.

20. sep. 2021Heilbrigðisráðuneytið, Líf og heilsa

Átaksverkefni um aukna geðheilbrigðisþjónustu fyrir börn við Sjúkrahúsið á Akureyri

Heilbrigðisráðherra hefur ákveðið að ráðstafa 13 milljónum króna til að efla tímabundið þjónustu barna- og unglingageðteymis Sjúkrahússins á Akureyri. Heilbrigðisráðherra hefur áður ráðstafað 102 milljónum króna í tiltekin átaksverkefni hjá Landspítala sem miða að því að efla geðheilbrigðisþjónustu við börn og ungt fólk og stytta bið eftir greiningu og meðferð. Fyrir liggur að heimsfaraldur Covid-19 hefur skapað ýmis vandkvæði við veitingu þessarar mikilvægu þjónustu, samhliða því að eftirspurn eftir tilteknum þáttum geðheilbrigðisþjónustu hefur aukist.

16. sep. 2021Heilbrigðisráðuneytið, Líf og heilsa

Markviss uppbygging geðheilbrigðismála

Hlutverk heilsugæslunnar hvað varðar geðheilbrigðisþjónustu um land allt hefur verið styrkt með aukinni sálfræðiþjónustu, geðheilsuteymum og þverfaglegri teymisvinnu á undanförnum árum. Til þess að bregðast við neikvæðum afleiðingum af heimsfaraldri COVID-19 og heimskreppu var farið út í frekari aðgerðir til þess að efla geðheilbrigðisþjónustu í landinu sem byggja á grunni þeirra aðgerða sem sannað hafa gildi sitt samkvæmt geðheilbrigðisáætlun Alþingis.

15. sep. 2021Atvinnuvegir, Líf og heilsa, Neytendamál, Umhverfi og náttúruvernd, Lýðheilsa og forvarnir, Atvinnuvegaráðuneytið

Endurskoðun á eftirlitskerfi með matvælum, mengunarvörnum og hollustuháttum

Atvinnuvega- og nýsköpunarráðuneytið og umhverfis- og auðlindaráðuneytið hafa undanfarið haft til skoðunar eftirlitskerfi hins opinbera með matvælum, hollustuháttum og mengunarvörnum. Eftirlitið er í dag bæði í höndum ríkisstofnana og heilbrigðisnefnda sveitarfélaga á tíu heilbrigðiseftirlitssvæðum.

11. sep. 2021Heilbrigðisráðuneytið, Líf og heilsa

Skilyrði um 12 mánaða starfsnám sálfræðinga fyrir útgáfu starfsleyfis frestað

Heilbrigðisráðherra hefur ákveðið að fresta til 1. júlí 2023 gildistöku reglugerðarákvæðis sem kveður á um að 12 mánaða verkleg þjálfun að loknu framhaldsnámi sálfræðinga (cand.spych) sé skilyrði fyrir útgáfu starfsleyfis. Frestunin gildir einnig um sálfræðinga sem útskrifast hafa frá 1. júlí sl. Landsráði um mönnun og menntun í heilbrigðisþjónustu verður falið að gera tillögu til heilbrigðisráðherra, eigi síðar en næsta vor, um fyrirkomulag verklegrar þjálfunar. Tíminn fram að gildistöku ákvæðisins í júlí 2023 verði nýttur til að skipuleggja og koma á fót verklegri þjálfun í samræmi við tillögur landsráðs.

06. sep. 2021Heilbrigðisráðuneytið, Líf og heilsa, Landsráð

Fyrsti fundur landsráðs um mönnun og menntun í heilbrigðisþjónustu

Landsráð um mönnun og menntun í heilbrigðisþjónustu hefur tekið til starfa og hélt sinn fyrsta fund í vikunni. Það er skipað af heilbrigðisráðherra og er ætlað að vera ráðgefandi fyrir undirbúning ákvarðana á sviði mönnunar og menntunar í heilbrigðisþjónustu, auk þess að vera samráðsvettvangur á breiðum grundvelli um þessi mál. Á fyrsta fundi landsráðsins var starfið framundan skipulagt með hliðsjón af skipunarbréfi og rætt um helstu áherslumál við upphaf vinnunnar. Gert er ráð fyrir að landsráð skili heilbrigðisráðherra ár hvert tillögum að áætlun um aðgerðir í þágu mönnunar og menntunar í heilbrigðisþjónustu. Formaður landsráðsins er Bára Hildur Jóhannsdóttir.

06. sep. 2021Heilbrigðisráðuneytið, Líf og heilsa

Ákvörðun um byggingu heilsugæslustöðvar í Reykjanesbæ

Heilbrigðisráðherra hefur tekið ákvörðun um byggingu nýrrar heilsugæslustöðvar í Innri-Njarðvík í Reykjanesbæ sem á að þjóna um 15.000 íbúum. Húsnæði stöðvarinnar verður um 1.350 fermetrar. Ríkissjóður fjármagnar framkvæmdina að fullu en Reykjanesbær leggur til lóðina og liggur fyrir ákvörðun um að heilsugæslustöðin verði reist við Tjarnarbraut/Njarðarbraut. Mikil þörf er á bættri aðstöðu fyrir heilsugæsluþjónustu á svæðinu því naumur húsakostur stendur þjónustunni fyrir þrifum og hefur þurft að sinna hluta heilsugæsluþjónustunnar í bráðabirgðaaðstöðu við sjúkrahús Heilbrigðisstofnunar Suðurnesja.

06. sep. 2021Heilbrigðisráðuneytið, Líf og heilsa

Skýrsla til umsagnar: Þjónusta við einstaklinga með langvinna verki

Starfshópur sem heilbrigðisráðherra fól að afla upplýsinga um meðferð fyrir einstaklinga með langvinna verki hefur skilað ráðherra skýrslu með niðurstöðum sínum og tillögum til úrbóta. Skýrslan er hér með birt til umsagnar í samráðsgátt. Á grundvelli skýrslunnar og umsagna um hana mun ráðuneytið móta áætlun um aðgerðir til næstu ára til að hrinda úrbótum í framkvæmd. Liður í verkefni starfshópsins var að greina fjölda, aldur og kyn þeirra sem eiga við langvinna verki að stríða, auk þess að kortleggja þá meðferð sem stendur til boða og hvar hún er veitt.

04. sep. 2021Heilbrigðisráðuneytið, Covid-19, Líf og heilsa

COVID 19: Ísland þátttakandi í innleiðingu samræmdra vottorða á Evrópska efnahagssvæðinu

Hafin er vinna sem miðar að því að taka inn í samninginn um Evrópska efnahagssvæðið tillögu að reglugerð framkvæmdastjórnar Evrópusambandsins um samræmt vottorðakerfi vegna COVID-19, svokölluð græn vottorð. Markmiðið er að greiða fyrir frjálsri för og tryggja um leið örugg ferðalög milli landa. Stefnt er að því að reglugerð um græn vottorð geti tekið gildi seinni hlutann í júní næstkomandi. Fjallað var um málið á fundi ríkisstjórnar í dag.

04. sep. 2021Heilbrigðisráðuneytið, Líf og heilsa

Til umsagnar: Drög að reglugerð um breytingu á reglugerð um endurgreiðslu kostnaðar vegna þjónustu sjálfstætt starfandi sérgreinalækna sem starfa án samnings við Sjúkratryggingar Íslands

Birt hafa verið til umsagnar í samráðsgátt drög að breytingu á reglugerð um endurgreiðslu kostnaðar vegna þjónustu sjálfstætt starfandi sérgreinalækna sem starfa án samnings við Sjúkratryggingar Íslands. Samningur Læknafélags Reykjavíkur, fyrir hönd sjálfstætt starfandi sérgreinalækna, sem gerður var í lok árs 2013 rann út í lok árs 2018. Síðan þá hafa samningar ekki náðst milli aðila. Í lögum um sjúkratryggingar er skýrt kveðið á um þá meginreglu að til þess að ríkið greiði hlutdeild í kostnaði við heilbrigðisþjónustu þurfi að liggja fyrir samningur milli aðila um veitingu þjónustunnar. Lögin heimila þó ráðherra að setja reglugerð um tímabundna endurgreiðslu til sjúkratryggðra á kostnaði vegna heilbrigðisþjónustu á grundvelli gjaldskrár sem sjúkratryggingastofnunin gefur út.…

03. sep. 2021Heilbrigðisráðuneytið, Heilbrigðismál, Líf og heilsa

Nýsköpun í öldrunarþjónustu verður til á gamla Sólvangi

Heilbrigðisráðuneytið og Hafnarfjarðarbær hafa gert með sér samning sem felur í sér endurgerð húsnæðis gamla Sólvangs þar sem komið verður á fót nýrri tegund sérhæfðrar þjónustu fyrir aldraða. Heilbrigðisráðherra og bæjarstjóri undirrituðu samninginn á Sólvangi í dag. Í húsinu verða rými til skammtíma- og hvíldarinnlagna fyrir 39 einstaklinga þar sem veitt verður létt endurhæfing og lagt mat á frekari stuðningsþarfir viðkomandi. Gert er ráð fyrir að árlega verði hægt að veita að minnsta kosti 250 einstaklingum þessa þjónustu. Markmiðið er að efla getu fólks til að búa lengur heima. Að auki verður opnuð ný hjúkrunardeild í húsinu með aðstöðu fyrir 11 einstaklinga. Heilbrigðisráðuneytið mun veita Hafnarfjarðarbæ 120 milljónir króna vegna verkefnisins.

02. sep. 2021Heilbrigðisráðuneytið, Líf og heilsa

Ráðherra úthlutar 85 milljónum króna í styrki úr Lýðheilsusjóði

Svandís Svavarsdóttir heilbrigðisráðherra hefur úthlutað 85 milljónum króna í styrki úr Lýðheilsusjóði til 174 verkefna og rannsókna sem m.a. hafa að markmiði að efla geðheilsu barna og fullorðinna. Einnig voru veittir styrkir til verkefna tengdum áfengis- vímu- og tóbaksvörnum, næringu, hreyfingu og kynheilbrigði. Hæstu styrkirnir, 2,5 milljónir króna renna til þriggja verkefna. Háskóli Íslands fær 2,5 milljónir króna vegna þátttöku í alþjóðlegum rannsóknum á heilsu og líðan ungmenna, SÁÁ fær sömu styrkfjárhæð vegna sálfræðiþjónustu fyrir börn alkóhólista og Rannsóknir og greining vegna rannsóknar á högum og líðan ungmenna á tímum COVID-19.

31. ágú. 2021Heilbrigðisráðuneytið, Líf og heilsa

OECD: Hlutfall lækna og hjúkrunarfræðinga hvergi hærra nema í Noregi og Sviss

Ísland er í þriðja sæti í nýrri samantekt OECD sem sýnir hlutfall lækna og hjúkrunarfræðinga á hverja 1.000 íbúa í 32 ríkjum. Læknar eru hér 3.89 á hverja 1.000 íbúa og hjúkrunarfræðingar 15.73. Hæst er hlutfallið í Noregi og næsthæst í Sviss. Stofnunin bendir á að ríki sem standa vel hvað þetta varðar séu betur í stakk búin en önnur til að takast á við heimsfaraldur COVID-19 meðan hann varir.

31. ágú. 2021Heilbrigðisráðuneytið, Líf og heilsa

Sjúkraþjálfarar án samnings: Afnám kröfu um tveggja ára starfsreynslu vegna endurgreiðslu

Heilbrigðisráðherra hefur framlengt til 31. október gildistíma reglugerðar um endurgreiðslu kostnaðar vegna þjónustu sjúkraþjálfara sem starfa án samnings við Sjúkratryggingar Íslands. Jafnframt er fellt úr gildi það skilyrði fyrir endurgreiðslu að sjúkraþjálfari hafi starfað í að minnsta kosti 80% starfshlutfalli í tvö ár eftir löggildingu.

31. ágú. 2021Heilbrigðisráðuneytið, Líf og heilsa

Liðskiptasetur sett á fót á Akranesi – hægt verður að gera um 430 aðgerðir á ári

Liðskiptaaðgerðum verður fjölgað umtalsvert með opnun liðskiptaseturs, þ.e. skurðstofu þar sem eingöngu er sinnt liðskiptaaðgerðum, við Heilbrigðisstofnun Vesturlands á Akranesi (HVE). Gert er ráð fyrir að liðskiptasetrið taki að fullu til starfa í mars á næsta ári. Stofnunin verður þá með getu til að framkvæma um 430 aðgerðir á ári sem er rúmlega tvöföldun á núverandi afkastagetu. Stofnun setursins er liður í víðtækari áætlun sem unnið hefur verið að síðustu misseri í samræmi við ákvörðun heilbrigðisráðherra, til að mæta vaxandi þörf fyrir þessar aðgerðir, stytta bið fólks í brýnni þörf, bæta verkferla og samræma þjónustuna.

31. ágú. 2021Heilbrigðisráðuneytið, Líf og heilsa, Landsráð

Breytt verkaskipting heilbrigðisstétta með áherslu á störf sjúkraliða til umfjöllunar í landsráði

Heilbrigðisráðherra hefur falið landsráði um mönnun og menntun að fjalla um verkaskiptingu heilbrigðisstétta með áherslu á fela sjúkraliðum aukin verkefni og nýta þannig betur færni þeirra í verkefnum heilbrigðisþjónustunnar. Jafnframt hefur Landspítala verið falið að skipuleggja og bjóða námskeið í hermisetri fyrir sjúkraliða sem nýtist þeim í störfum á hágæsludeildum og vöknun á spítalanum.

27. ágú. 2021Heilbrigðisráðuneytið, Líf og heilsa

Verklag heilbrigðisþjónustu við móttöku þolenda heimilisofbeldis verði samræmt

Ýtarleg greining á fyrirkomulagi móttöku þolenda heimilisofbeldis í heilbrigðisþjónustunni sýnir að brýn þörf er á samræmdu verklagi, bættri og samræmdri skráningu þessara mála og aukinni fræðslu fyrir heilbrigðisstarfsfólk. Starfshópur sem heilbrigðisráðherra fól að gera tillögur til úrbóta og Drífa Jónasdóttir afbrotafræðingur fór fyrir, hefur skilað skýrslu með tillögu að verklagi ásamt tillögum um aðgerðir til að tryggja innleiðingu samræmds verklags og betri þjónustu við þennan hóp á landsvísu.

27. ágú. 2021Heilbrigðisráðuneytið, Covid-19, Líf og heilsa

Ráðstöfun rúmlega 100 milljóna króna til geðheilbrigðisþjónustu við börn og ungt fólk

Heilbrigðisráðherra hefur ákveðið að ráðstafa 102 milljónum króna í tiltekin þverfagleg átaksverkefni á vegum Landspítala sem miða að því að efla geðheilbrigðisþjónustu við börn og ungt fólk. Meðal þessara verkefna eru gagnreynd námskeið í félagsfærni hjá BUGL (Barna- og unglingageðdeild Landspítala), fjölgun greiningarviðtala hjá BUGL fyrir börn með mögulega röskun á einhverfurófi samfara öðrum geðrænum vanda til að stytta bið eftir greiningu, auk markvissra aðgerða til að stytta bið eftir þjónustu þunglyndis- og kvíðateymis geðþjónustu Landspítala, þjónustu átröskunarteymisins og þjónustu áfallateymisins. ​

26. ágú. 2021Heilbrigðisráðuneytið, Covid-19, Líf og heilsa

COVID-19: Tilslakanir á sóttvarnaráðstöfunum frá og með 28. ágúst

Fjöldatakmarkanir miðast áfram við 200 manns og reglur um 1 metra nálægðarmörk og grímuskyldu verða óbreyttar. Aftur á móti verður sund- og baðstöðum, heilsu- og líkamsræktarstöðvum heimilt að taka á móti leyfðum hámarksfjölda gesta samkvæmt starfsleyfi, eins metra regla felld niður meðal áhorfenda á íþróttaviðburðum og í sviðslistum, auk fleiri tilslakana sem nánar eru raktar hér að neðan. Heilbrigðisráðherra kynnti þessar breytingar á fundi ríkisstjórnar í morgun og eru þær í samræmi við tillögur sóttvarnalæknis. Reglugerð þessa efnis tekur gildi 28. ágúst og gildir til 17. september.

26. ágú. 2021Heilbrigðisráðuneytið, Líf og heilsa

Reglugerð um endurgreiðslur fyrir þjónustu sjálfstætt starfandi sérgreinalækna framlengd

Heilbrigðisráðherra hefur ákveðið að framlengja gildistíma reglugerðar um endurgreiðslu kostnaðar vegna þjónustu sjálfstætt starfandi sérgreinalækna sem starfa án samnings við Sjúkratryggingar Íslands til 30. nóvember. Samhliða er framlengdur gildistími reglugerðar um endurgreiðslu kostnaðar fyrir einnota áhöld og efni vegna þjónustu þeirra, einnig til 30. nóvember. Framlenging reglugerðanna tryggir sjúklingum áframhaldandi greiðsluþátttöku sjúkratrygginga samkvæmt gjaldskrá Sjúkratrygginga Íslands, þrátt fyrir að enn hafi ekki tekist samningar milli SÍ og sjálfstætt starfandi sérgreinalækna um þjónustu þeirra.

19. ágú. 2021Heilbrigðisráðuneytið, Líf og heilsa

Beint streymi frá heilbrigðisþingi, föstudag 20. ágúst kl. 9-16

Framtíðarsýn um heilbrigðisþjónustu við aldraða verður meginefni heilbrigðisþingsins föstudaginn 20. ágúst sem hefst kl. 9.00 með ávarpi Svandísar Svavarsdóttur heilbrigðisráðherra. Fólk er hvatt til að fylgjast með áhugaverðu þingi í beinu streymi og taka virkan þátt í gegnum forritið Slido. Streymt er á vefnum www.heilbrigdisthing.is og þar eru einnig nánari upplýsingar um þingið.

18. ágú. 2021Heilbrigðisráðuneytið, Líf og heilsa

Sérhæfð heilbrigðisþjónusta við aldraða í heimahúsum á höfuðborgarsvæðinu efld

Öldrunarteymið SELMA sem stofnað var á liðnu ári og veitir sérhæfða þjónustu við aldraða í heimahúsum í Reykjavík verður stóreflt og þjónusta þess aukin. Þjónustusvæðið verður stækkað þannig að þjónustan nái til allra sveitarfélaga á höfuðborgarsvæðinu og hún verður nú einnig í boði um helgar. Heilbrigðisráðherra hefur ákveðið að verja 250 milljónum króna af fjárlögum ársins til þessa verkefnis. Markmiðið er að bæta þjónustu við einstaklinga í heimahúsum sem ekki komast til mats og meðferðar á heilsugæslu eða göngudeild og draga úr þörf viðkomandi fyrir heimsókn á bráðamóttöku eða sjúkrahúsinnlögn.

18. ágú. 2021Heilbrigðisráðuneytið, Líf og heilsa

Aðgerðaáætlun um heilsueflingu aldraðra birt

Komið verður á formlegu samstarfi ríkis og sveitarfélaga um heilsueflingu aldraðra, stefnumótun um heilsueflingu og virkni verður liður í sóknaráætlunum landshluta, hlutverk heilsugæslunnar á þessu sviði verður aukið, unnið verður að markvissri fræðslu fyrir aldraða um heilsueflingu sömuleiðis verður stuðlað að betra heilsulæsi aldraðra. Þetta eru dæmi um aðgerðir sem ráðist verður í samkvæmt nýrri aðgerðaáætlun um heilsueflingu aldraðra sem unnin var af starfshópi á vegum heilbrigðisráðherra.

16. ágú. 2021Heilbrigðisráðuneytið, Líf og heilsa

Forval vegna hönnunar nýbyggingar við endurhæfingardeild Grensáss

Aðstæður til endurhæfingar munu gjörbreytast og endurhæfingarrýmum fjölga með nýbyggingu við endurhæfingardeild Landspítala við Grensás sem er í undirbúningi. Ríkiskaup auglýsa nú eftir umsóknum um þátttökurétt í lokuðu útboði vegna hönnunar húsnæðisins. Áætlaður heildarkostnaður við nýbygginguna sem verður allt að 3.800 fermetrar er um 2,9 milljarðar króna.

13. ágú. 2021Heilbrigðisráðuneytið, Líf og heilsa

Öldrunarlæknirinn doktor Samir Sinha gestafyrirlesari á heilbrigðisþinginu 20. ágúst

Minnt er á heilbrigðisþing 2021 sem heilbrigðisráðherra hefur boðað til 20. ágúst og fjallar um framtíðarsýn í heilbrigðisþjónustu við aldraða. Meðal fyrirlesara á þinginu verður Dr. Samir Sinha frá Kanada. Auk læknismenntunar er Sinha með doktorsgráðu í félagsfræði, hann hefur víðtæka reynslu og þekkingu á heilbrigðisþjónustu við aldraða, er eftirsóttur stefnumótandi á því sviði og hefur veitt ráðgjöf til spítala og heilbrigðisyfirvalda víða um lönd. Á þinginu verður m.a. fjallað um drög að stefnu um heilbrigðisþjónustu til ársins 2030 sem birt var í samráðsgátt stjórnvalda til umsagnar í byrjun júlí síðastliðinn.

10. ágú. 2021Heilbrigðisráðuneytið, Líf og heilsa

Alþjóðlegur dagur líknarþjónustu, 9. október 2021

Alþjóðlegur dagur líknarþjónustu er á morgun, 9. október. Tilgangur hans er að vekja athygli á mikilvægi líknarþjónustu og hvers vegna þurfi að tryggja að allir hafi aðgang að henni sama hvar þeir búa, á hvaða aldri þeir eru og hver bakgrunnur þeirra er. Heilbrigðisráðherra staðfesti fyrr á þessu ári aðgerðaáætlun til fimm ára um líknarþjónustu hér á landi sem byggð var á skýrslu tveggja starfshópa og tillögum þeirra um skipulagningu líknar- og lífslokameðferðar um allt land.

06. ágú. 2021Heilbrigðisráðuneytið, Líf og heilsa

Ráðherra úthlutar 28 milljónum króna í gæða- og nýsköpunarstyrki

Svandís Svavarsdóttir heilbrigðisráðherra hefur úthlutað rúmum 28 milljónum króna í gæða- og nýsköpunarstyrki til 13 verkefna. Að þessu sinni var sérstök áhersla lögð á verkefni sem nýtast heilbrigðisþjónustunni í kjölfar heimsfaraldurs. Verkefnin þurftu að hafa skýran ávinning fyrir heilbrigðisþjónustuna og þann hóp sem þjónustan beinist að. Styrkirnir voru veittir á sameiginlegri ráðstefnu heilbrigðisráðuneytis og Landspítala 1. júní sl. þar sem fjallað var um þróun heilbrigðisþjónustu á tímum breytinga og þar voru verkefnin sem hlutu styrki kynnt.

05. ágú. 2021Utanríkisráðuneytið, Utanríkismál, Covid-19, Heilbrigðisráðuneytið, Líf og heilsa

Ísland gefur öndunarvélar til Indlands

Í ljósi alvarlegrar stöðu kórónuveirufaraldursins á Indlandi hafa þarlend stjórnvöld þegið boð íslenskra stjórnvalda um að senda 17 öndunarvélar til Indlands. Öndunarvélarnar eru gjöf frá Landspítala og verða þær fluttar, með milligöngu heilbrigðisráðuneytisins og utanríkisráðuneytisins, á vegum almannavarna Evrópusambandsins sem Ísland tekur þátt í á grundvelli EES-samstarfsins.

04. ágú. 2021Heilbrigðisráðuneytið, Covid-19, Líf og heilsa

COVID-19: Aðgerðir á landamærum - breytt skilyrði um dvöl í sóttkví

Skýrari kröfur verða gerðar um skilyrði fyrir heimasóttkví varðandi húsnæði og umgengnisreglur. Þeir sem ekki geta verið í heimasóttkví sem uppfyllir sett skilyrði þurfa að fara í sóttvarnahús en ekkert gjald verður tekið fyrir dvölina. Þetta er meðal efnis reglugerðar heilbrigðisráðherra sem tekur gildi 9. apríl og byggist á tillögum sóttvarnalæknis. Meginmarkmiðið er að lágmarka eins og kostur er líkur á því að smit berist inn í landið, með þeim aðgerðum sem sóttvarnalög heimila. Með reglugerðinni er felld úr gildi reglugerð nr. 355/2021 sem tók gildi 1. apríl og þar með ákvæði um skyldu einstaklinga af hááhættusvæðum til að dvelja í sóttkví í sóttvarnahúsi sem héraðsdómur úrskurðaði að ekki væri fullnægjandi lagastoð fyrir.

02. ágú. 2021Heilbrigðisráðuneytið, Líf og heilsa

Ríkið sýknað í Hæstarétti af kröfu Grundar, Áss og Hrafnistu um greiðslu húsaleigu

Hæstiréttur hefur staðfest dóma Landsréttar þar sem ríkið er sýknað af kröfum Grundar hjúkrunarheimilis og Dvalarheimilisins Áss í Hveragerði annars vegar og Hrafnistu í Laugarási og Hraunvangi hins vegar, um að ríkið skuli greiða þeim endurgjald fyrir fasteignir sem þeir lögðu til undir starfsemi sína á árunum 2013 – 2016.

02. ágú. 2021Heilbrigðisráðuneytið, Covid-19, Líf og heilsa

Breyting á sóttvarnalögum samþykkt á Alþingi

Frumvarp Svandísar Svavarsdóttur heilbrigðisráðherra til breytinga á sóttvarnalögum var samþykkt á Alþingi í liðinni viku með öllum greiddum atkvæðum. Með lagabreytingunni er kveðið skýrar á um til hvaða ráðstafana er heimilt að grípa vegna farsóttarhættu og útbreiðslu smits, í hvaða tilvikum og með tilliti til meðalhófssjónarmiða. Markmið breytinganna er að tryggja að slíkar skerðingar á stjórnarskrárvörðum réttindum fólks styðjist við viðhlítandi lagaheimild og séu ekki framkvæmdar nema í þágu almannahagsmuna eða til verndar heilsu eða réttindum annarra. Með lagabreytingunni er kveðið á um að meðan á sóttvarnaaðgerðum stendur skuli ráðherra upplýsa Alþingi um sóttvarnaaðgerðir með mánaðarlegri skýrslugjöf hafi aðgerð varað lengur en í tvo mánuði.