Niðurdæling CO2 og H2S frá Hellisheiðavirkjun

Carbfix er tæknilausn sem byggir á íslensku hugviti sem bindur koldíoxíð varanlega í bergi á innan við tveimur árum. Kolefnisförgun á stórum skala er nauðsynleg til að loftslagsmarkmið heimsins náist.

Carbfix leysir koldíoxíð og brennisteinsvetni upp í vatni og dælir niður djúpt í basaltberlög við Hellisheiðarvirkjun þar sem það breytist í varanlegar karbónat og súlfíð steindir.

Markmið verkefnisins er að fanga og farga 95% af heildarlosun virkjunarinnar.

Stefnt er að gangsetja nýju stöðina árið 2025.

Magn koldíoxíðs og brennisteinsvetni sem dælt er niður í berglög.

1. febrúar 2023

Núverandi föngunarstöð í Hellisheiðarvirkjun er 13 metra há lofthreinsistöð sem leysir upp 15.000 tonn af CO2 og 8.000 tonn af H2S í vatni á hverju ári. Þessu er svo dælt niður í jörðina í basalt, þar sem það breytist í varanlegar karbónat og súlfíð steindir. Ný lofthreinsistöð með aukna föngunargetu mun auka nýtni föngunar upp í 95% af heildarlosun virkjunarinnar.

1. febrúar 2021

Á tímabilinu 2019-2020 var unnið að frekari þróun Carbfix tækninnar þannig að hún geti nýst sem víðast í baráttunni gegn hlýnun jarðar. Sumarið 2019 var undirrituð þríhliða viljayfirlýsing milli íslenskra stjórnvalda, Orkuveitu Reykjavíkur og stóriðjunnar um að kanna fýsileika þess að minnka kolefnisspor iðjuvera hér á landi með bindingu koldíoxíðs í basalti. Carbfix tæknin hlaut í kjölfarið aukið vægi í 2. útgáfu aðgerðaráætlunar Íslands í loftslagsmálum hvað varðar minnkun útblásturs frá orkuframleiðslu og stóriðju. Frá upphafi ársins 2020 hefur Carbfix verið rekið sem sjálfstætt dótturfélag OR. Haustið 2020 var undirritaður tímamótasamningur við svissneska fyrirtækið Climeworks um aukna förgun á CO2 sem hreinsað er beint úr andrúmslofti. Undir lok ársins 2020 hafði alls um 63 þúsund tonnum af CO2 verið fargað með Carbfix tækninni frá Hellisheiðarvirkjun sem Orka náttúrunnar rekur.