CO2 verður fangað úr útblæstri frá iðnaði í Evrópu og flutt fljótandi með skipum til Straumsvíkur þar sem því er dælt í geymslutanka við hafnarbakkann. CO2 er leyst í vatni áður en því er dælt djúpt í berglög þar sem það steinrennur á innan við tveimur árum með Carbfix tækninni sem hermir eftir og flýtir náttúrulegum ferlum. Aðferðin hefur verið sannreynd sem hagkvæm og umhverfisvæn leið til að binda CO2 varanlega og koma þannig í veg fyrir áhrif þess á loftslagið.